لقاء مع الكاتب محمد ناجى عبد الله – حصريا على مجتمع حروف

3 386

محمد ناجى عبد الله “أشيك واد فى شبرا”

نبذة عن الكتاب :

طبيب مصرى متعدة المواهب ( رسام مبدع ، كاتب متألق ، عازف فنان ، دكتور أسنان) تخرّج من كلية طب جراحة الفم والأسنان جامعة «مصر الدولية»، وشارك كفنان تشكيلي في معارض جماعية، كما أقام أول معرض خاص به في «أتيليه القاهرة» بعنوان «مقتطفات». و أخر أعماله الأدبيه كتاب “أشيك واد فى شبرا “.

مرحبا يا دكتور فى موقعنا حروف ،شرفتنا النهاردة بقبولك الحوار ؟

أهلا بيكي

الناس كتير بتسأل ما علاقة الطب بالكتابة ؟!وأنت ككاتب ،وموسيقى ،ورسام، تمتلك المواهب الثلاثة الأكثر تأثيرا على الانسان! حضرتك شايف انت بتأثر على المتلقى فى أي فن أكثر؟

بصى الثلاثة على علاقة قوية جدا. و استحالة تلاقى دكتور شاطر بحق و حقيقى و مايكونشى فنان , الفن يعنى حس و دقة و أهتمام بأصغر تفاصيل و لكن تقديمها ب أبسط الطرق , اللوحة الصعبة جدا او المنظر القوى الفنان بيدخل جوة تفاصيله , التفاصيل اللى مش اى حد يشوفها لكن بيقدمها للناس بأبسط صورة , لدرجة هاتخليهم يقولوا : “طب ماهى سهلة أهى“!!! ,لكن استحالة يعرفوا يقلدوه ،كذلك الطبيب. و الموسيقي , كل واحد فيهم بيشخص المشكلة “نفس المنهج“ , لكن الناس مابتاخدشى بالها

اشيك واد في شبرا جه ازى ؟!هل الأمر يتعلق بشكل من أشكال التجربه الإبداعي بحثا عن الذات ؟!

هو كدة بالظبط….الفكرة فانى بأتعامل مع الكتابة كنوع من طرق التعبير الابداعى، عايز اثبت ان الفنان الحقيقى يقدر يعبر بأى حاجة…بصوته، برسمه، بمزيكته، بتعبيراته و حركاته لو ممثل، و بكتاباته لو كاتب , فى النهاية هو موهبته الحقيقية “التعبيير“ بشتى أنواعه

هل لديك احساس ان الكتاب هيأثر فى الناس بقدر ما كنت متوقع ؟ و هل انت كفنان وككاتب تتبع اي مدرسه ادبيه او فنيه ؟

بصراحة انا اتبسط جدا أنه أثر فى كل اللى قرأه من كل الأعمار العمرية تقريبا، و ده ي في حد ذاته عندى بالدنيا كلها

بالنسبة للمدارس ، عمرى ف حياتى ما قيدت نفسى بمدرسة ثابتة أبداااا، سواء مدرسة أدبية أو فنية و بشوف أن الفنان لازم يكون عنده القدرة أنه يتنقل بين المدارس يكون عنده حرية أستخدام أساليب كل المدارس بمزاجه لأن كون أنه يتقيد بمدرسة واحدة ف ده أكبر دليل على انه “مقيد“…و بالتالى مش فنان أصلا و أنما مجرد “تابع“ أو صنايعى

تقصد ممنهج

بالظبط

رأيك فى الأدب والفن بشكل عام فى المرحله الراهنه؟

على رأى الكاتبة دكتور إيمان الدواخلى…. عامل زي  ” الجزم الضيقة ” , أما رأيى أنا ف بحس أنه بقى مكرر كتيير…لو الموضة كذا…كله هايعملها، الغريب أن الكتاب الشباب فيه منهم عايز يوصل بسرعة ف بيتبعوا اسلوب غريب أوى و بيستعملوا طريقة كتابة السيناريو فى الكتابة الادبية علشان لو منتج شافوا ولا حاجة ممكن ياخده يعمله فيلم فطبعا بيطلعلك منتج بوصف ممل جداا جداا للقارىء، بيخليه يتخيل اه، لكن ممكن يتوهه ويخليه عايز يعدى الرواية بسرعة ، بيفقد نكهة الوصف اللذيذ اللى يخليه يستمتع

أيه رأيك فى الرأى أو الثوره الجديدة ضد الأدب العامى المتنشر، حضرتك معاهم في الرأى ، أو شايف أن اللغة لغة المجتمع ؟!

و الله شوفى، أنا معاهم فى حالة واحدة بس، اللى أنا أتبعتها عشان ماقللشى من قدر كتابى أن يكون الموضوع قوى جدااا و ذا أهمية تستدعى إنك تتكلم بالعامية عشان يوصل لكل الناس الفايدة بتاعتك

لكن ضدهم في أن بالمنظر ده أى حد ها يكتب أى حاجة هبله حتى لو قاعد عالقهوة و ده هايخلى فيه تجاوزات أخلاقية كتييير اوى يعنى يبقى ليها أساس أدبى مش أى كلام*

أكييد طبعا. او أساس علمى، بمعنى أنه اللى بيخلى الواحد يكتب بالعامية أيه?

يا أما موضوع مهم أوى عايز يوصله لأكبر شريحة او أنه مابيعرفشى يكتب باللغة العربية، فبدل ما يهين اللغة، بيكتب بلغة عامية محترمة

لكن فيه ناس بتكتب زبالة و قلة أدب. بالعامية كمان و يقولك أنا بكلم الشعب

ده بقى أنا ضده تمااامااااا

شايف أنه يجب وجود رقابه على الكتابه ولا سيكون تقييد لحدود الكاتب ؟

على حسب هو كاتب لميين… يعنى المفروض الكاتب يكون معرف من بره كتابه أن الكتاب ده بيكلم سن كذا، أو أن بعض شخصيات الكتاب هى شخصيات مثلا بطبع معين قد يصدر منها الفاظ ده فى رأيى الشخصى مافيهوش تقييد و برده فيه أحترام لرغبة القراء، لكن الكاتب المحترف للأسف يقدر يحط السم فى العسل ف للأسف هى مسألة مبدأ

أيه رايك فى أنتشار دور النشر ،وشايف أنه سهل موضوع على الكتاب الشباب، وساعد على أنتشار شبة الادب ؟

ده اكيييد طبعا …. بصى هو ليه ميزة أنه فيه ناس كويسين جدا ككتاب أخدوا فرصتهم و لا داعى لذكر أسماء تستحق الإحترام و التقدير , لكن العيب أنه برده بقى موضوع تجارى فأى حد بقى بيكتب أى حاجة و ينشرها و هى برده محتابة من الكاتب أنه يتحرى الصدق و الأمانة ف شغله

الفيس بوك نافذه على العالم منها أبتداء معظم الكتاب الشباب شايف أن الفيس شهره للكاتب ؟ وأيه رأيك فى انتشار الكتب بى دى أف هل هى ضد الكتاب ولا شهره ليه؟

الفيسبوك أكييد بيعرف الناس على بعضها و يقربهم لبعض و بيخلق جو من التواصل و الألفة، و علاقات طبعا بتساهم فى أنتشار الكاتب أما عن أنتشار الكتب pdf فهى عاملة بالظبط زى مبدأ الصيت ولا الغنى الكاتب ممكن يتضرب تجاريا شوية، بس هايبقى أشهر من نار على علم

بتقراء لمين ؟! وأيه رأيك فى الكتاب اللى بتتجه للأدب الأجنبي وبتقصى الأدب العربى ! شايف أن الأب العربى مبقاش ثروه كما كانت بالماضى !؟!

انا بأحب اقرا لتوفيق الحكيم، و انيس منصور….نجيب محفوظ و يوسف السباعى بأحبهم بس ليا عتاب على نجيب محفوظ انه بيوصف كتييير بزيادة ف اوقات بتخلينى عايز اخلص يوسف ادريس بقى حبيبى

بالنسبة لفكرة ان القراء بيتجهوا للادب الغربى، فده لأن معظم الادب عربى دلوقتى بقى “حكايات متكرره مافيش جديد…خصوصا فى المواضيع

ماذا بعد أشيك واد فى شبرا ؟! فى جديد !

فييه طبعا…رواية جديدة هاتكون باللغة العربية الفصحى، و لكن هاتتبع نفس مبدأى فى قوة الوصف و التشبيهات المختلفة و مابين سهولة الاسلوب و سخريته و مقدرشى أقولك أى حاجة عنها غير إسمها “مهيب الركن“

أسمها مشوق جدا…..

بس هاتكون مفاجأة و ماتعملتشى قبل كدة و بتناقش قضية قوية و خطيرة جدا قضية سياسية و أجتماعية بس من منظورى الشخصى، و قبل الثورة، عشان مابقاش بأقلد و خلاص

طولت عليك أخيرا رساله تحب توجه للقراء ، ورساله للكتاب الشابه اللي هتبداء طريقها فى النشر

 رسالة للقراء:

“انا قارىء زيكوا بالظبط، وعد منى أنى مش هاقبل ابدا انزلكوا من بيوتكوا و ادفعكوا تمن حاجة و اضيعلوكوا وقت بسببها الا اذا كانت تستحق بجدارة و تقدم فكرة مختلفة جدا“

رسالة للكتاب الجدد:

“إوعوا ترخصوا نفسكوا بشغل متقلد او تستهينوا بعقلية القارىء، لأنه مش غبى على الاطلاق، و عمره مابينسى كتاب اتضحك عليه فيه“

شكرا لسعة صدرك لينا ونتمنى لك المزيد من النجاح والتوفيق .

شكرا على ادبك و ذوقك يا كاتبة يا جميلة .

أجرى هذا القاء : معجزة أحمد

3 تعليقات
  1. شريف ربيع يقول

    المحاوَر والمحاورة، أحسنتما بارك الله فيكما☺

  2. سالم المطيرى يقول

    لقاء جميل نابع من شخص مثقف جدا
    بس عندى سؤال
    هل اقتصرت القراء على طبقه معينه من الشعب ام القراءة للجميع ؟

  3. رواء أحمد عبد العال يقول

    تحياتى دكتور محمد على قلم حضرتك الرائع البعيد كل البعد عن الإبتذال أو الاسفاف ، سؤالى بقى القى كتاب حضرتك فين ف الصعيد ؟ وليه احنا مهمشين كده ؟ بجد نفسى فى اشيك واد من شبرا ، ياريت حضرتك قلى اوصلة ازاى ؟

اترك ردك

لن يتم نشر بريدك الإلكتروني .