يوميات زوج حزين – الحلقة الثالثة – رد سجون

3 251

يوميات زوج حزين

رد سجون

المقدمة

بعد أنا أنهيت غسيل الصحون و تنظيف البيت و الطبخ و غسيل الملابس و نشرها كنت متعباً جداً جداً و العرق يتصبب من أعلي قرعتي التي ورثتها عن أبي بالمناسبة أنا أسمي ( شحاتة الحزين ) من عيلة ( زعلان ) باشا الكبير و أسمي بالكامل ( شحاتة الحزين أبو دمعة زعلان ) و طبعاً لأنكم شديدوا الملاحظة فأنا متأكد من أنكم لاحظتم طبعاً أن عائلتي كلها –و بلا أستثناء-حزينة لان جدي ( زعلان ) باشا الكبير رحمة الله مات محروق و أبنة الحج ( أبو دمعة ) مات مسموماً و بابا رحمة الله مات من أزمة قلبية و جميع هؤلاء ماتوا بسبب شئ واحد و أنا متأكد أنكم تعرفوا جيداً….

هو الزواج….كانت زوجة جدي ( زعلان ) باشا الكبير تجعلة يحل محلها في كل شئ الغسيل و الطبخ و تربية الأطفال علي بلاطة يعني هو أتبهدل أوي أوي أوي….و زوجة الحج ( أبو دمعة ) كانت بتعمل نفس الحكاية معاة و تتناقل الأفعال و التصرفات للزوجات علي مدا العصور حتي يأتي دوري لأن زوجتي تفعل هذا معي….

-<<خلصت الغسيل يا منييييل؟؟!!>>-

-<<جايلك يا حياتي>>-

معلش يا جماعة أمنا الغولة عيزاني سلام دلوقتي….

المؤلف/كريم محمد

 

1-أبو نسب…

إحم..إحم..السلام عليكم و رحمة الله و بركاتة..معكم السيد ( شحاتة الحزين ) اللي للأسف بيعيش أسوء حياة في الكون بس الحمد لله علي كل شئ ، طلب صغير أوي من جميع القراء و خصوصاً أنت يا اللي بتغمز للبنت اللي جمبك أوعي تفهم عنوان مغامرة النهاردة غلط ، أكيد كلكوا و بلا إستثناء أول لما شوفتوا القصة بعنوانها ” رد سجون ” كل واحد فيكوا  قال:يا نهار أبيض شحاتة دخل السجن و لا إية؟ أحب أقول لة:لا و ألف لا أنا لو رحت السجن هبقا رايح زيارة بس عشان مراتة محبوسة في جنحة و لا حاجة-من كتر الخناق مع البقال- لكن قصة النهاردة مختلفة عن كل توقعاتكوا…

*   *   *

تجدوني جالس علي الأريكة أشاهد برنامج سخيف – لأن جميع البرامج أصبحت سخيفة – و أنا ألوق بعض شطائر الفول التي أعدتها لنفسي ثم تدخل ( عديلة ) – شمطائي العزيزة..أقصد زوجتي- و أمارات الغضب تكاد تقفز من عينها فتقول لي و عازمة علي أخز آخر شطيرة عديلة:شفت؟..شفت الواد المنيل أبنك؟

شحاتة:مين؟( سيد ) و لا ( إستفتاح ) ؟

عديلة:الواد ( إستفتاح )..النهردا الصبح بيقول لي عايز بتاعة كدة أسمها آيس ووتش.

شحاتة:يا نهار أسود و منيل بستين نيلة أبني انا عايزني أشتريلوا خمور أعوذ بالله دة ناقص يقولك أنا ههرب مع بنت في تانية رابع.

عديلة:أستني بس انت فهمت غلط ، الآيس ووتش دي مش خمور.

شحاتة:أمال بخور يعني؟

عديلة:لا لا دي ماركة ساعة.

شحاتة:يخرب بيتك خضيتيني….ياااااااة….فين أيام زمان؟ أيام التربية علي حق عارفعة يا مراتي يا حبيبتي أيام زمان لو الواد قال لأبوة أنا عايز جزمة كاوتش أمة تتطلق في ليلتها مبالك الواد دة عايز آيس ووتش المفروض بقي أمة تتعدم في ميدان عام رمياً بالشباشب.

عديلة:مين دي اللي تترمي بالشباشب.

شحاتة:بقول لك أنا داخل أنام أحسن.

عديلة:مش هتروح عشان تستقبل ( مشرط )

شحاتة:( مشرط ) مين؟

عديلة:أخويا.

شحاتة:هو كان بيحج و لا إية؟

عديلة:لا د راجع من السجن.

*   *   *

2-الله يرحمك يا سيد .

قاعد في العربية قدام السجن مستني المحروس ( مشرط ) أخو مراتي لحد ميخلص إجراءات الإفراج و أخدوة و نروح .. آدي كمان واحد طالع إفراج أمال المنيل علي عينوا فين ؟ و بعد أربع ساعات و تلت خرج المحروس ( مشرط ) و حوالية شوية مقاطيع ميتخيروش عنة ..

ماسك في إيدة سيجارة ، شكلوا كان مش مريح ، تقريباً واخد مطوة تحت عينة الشمال أللي مش موجودة أساساً و لما خلص كلام مع المقاطيع راح ليا و هو مزقطت و بيقول :

–      أبو نسب.

–      أستاذ مشرط ؟

–      أستاذ ؟ عدم اللامؤاخذة الكولمة دي بتضايقني .

–      أنت تؤمر يا باشا..أركب.

–      حلوة ال128 دي ، دة أنا كنت فاكر لما هطلع من السجن هتكون إنقرضت ، الله يرحمك يا سيد .

–      سيد مين حضرتك ؟

–      اللي راح راح يا أبا ، سيبك من سيد دلوقتي المهم البت عديلة أختي كويسة ؟

–      عديلة الحمد لله بتسلم عليك .. إلا بالحق أنت دخلت السجن لية ؟

–      أنا أقول لك ، كنت قاعد مع أفراد العصابة بنلعب قمار .

–      و دة مش حرام ؟

–      عدم اللامؤخذة واحد رد سجون عايزة يلعب إية .. بنك الحظ ؟

–      وجهة نظر برضة.

–      المهم .. هووب البوليس كبس علينا و فتشنا واحد واحد ، و طبعاً كل واحد فينا اللي كان معاه حتة سلاح مش مترخسة و اللي شايل حشيش و محسوبك كان معاة الإتنين .

–      اللهم صلي علي النبي .

–      جتلك في الكلام لمونا كدة علي بعض و خدنا كل واحد 20 سنة ، الله يرحمك يا سيد .

–      يا أستاذ مين سيد دة بس ؟

–      اللي راح راح يابا سيبك من سيد دلوقتي ، المهم يا أبو نسب أن أنا جعان دلوقتي .

–      تحب أجيب لك سندوتشين فول و طعمية علي ما تروح تتغدي ؟

–      لا فول و طعمية إية بس .. أنا عايز فتة كوارع .

–      بس تقول لي مين سيد دة .

*  *  *

ذهبت إلي أحد المطاعم ليأكل ( مشرط ) باشا ثم عدنا إلي المنزل ، و حين دخل ، بدأت الزغاريط من كل ناحية.

عديلة : حمد الله ع السلامة .. يا 1000 نهار أبيض لولولولولولي.

إستفتاح : خالوا معاك سيجارة ؟

عديلة : إحترم نفسك يا واد ..

مشرط : وحشاني يا عديلة .

ثم يخرج مشرط مسدس من جيبة و يضرب عيارين في السقف .

عديلة : خش يا خويا كل لك لقمة من المطبخ .

مشرط : آة لحسان أنا جعان أوي !! الله يرحم أيام الفتة بتاعتك يا عديلة .

ثم تقترب عديلة مني و تخرج 100 جنية و تقول :

–      شحاتة .. بص .. خد ال100 جنية دي هاتلنا شوية فاكها علي خضار علي شوية تحابيش كدة و فوق الحجات دي عدي علي المعلم ( حرنكش ) بتاع النصبة اللي علي أول الشارع و قول لة عايز قرش حلواني صابح .

–      إية قرش حلواني صابح دة ؟

–      ملكش دعوة قول لة كدة بس .

*  *  *

بعد مجية خال العيال العزيز ( مشرط ) باشا ، الحال مبقاش هو الحال ، حد يلحقني يا جماعة ، العيال قربت تثبتني في تقاطع الصالة ، و في ليلة سودة صحيت بليل لقيت ( مشرط ) بيكلم حد في التليفون و بيقول :

–      الضربة الجاية قربت ، كلها يومين و أخلص و هنبيت الديب سايح في دمة ، الطالعة هتبقي جواني المرة دي ، نتقابل عند موكنة المزلقان ، أسلم و أستلم .

*  *  *

مفهمتش الصراحة إية العبارة لكن كان القلق مش سايب تفكيري و دماغي عمالة تودي و تجيب ، لحد ما في يوم صحينا و أكتشفنا أن     ( مشرط ) سرق كل حاجة في البيت ..

الله يرحمك يا سيد ..

المؤلف/كريم محمد

3 تعليقات
  1. رواء أحمد عبد العال يقول

    هههههههههههههههه جامد جامد كريم

    1. كريم محمد يقول

      أشكرك 🙂

  2. Mohamed Saad يقول

    يا سلام عليك يا كريم انت والناس اللى بتحكيلنا عنها دى
    اسلوبك جميل جدا فى الكتابه

اترك ردك

لن يتم نشر بريدك الإلكتروني .