يوميات زوج حزين – الحلقه الخامسة “ شيزلونج ” – لـ كريم محمد

1 367

يوميات زوج حزين – الحلقه الخامسة “ شيزلونج ” – لـ كريم محمد

السيطرة .. السيطرة في كل بيت مهمة جداً ، لكن في بيتي المتواضع السيطرة من طرف مراتي فقط ، و السمع و الطاعة عليا أنا ..

لا أسمح إن حد يقول أني مش راجل لا سمح الله ، لكن تقدر تقول أن شخصيتي ضعيفة شوية ..

و لكني قررت أروح لدكتور نفساني ، يشوف حل للموضوع دة ..

…….

<< لو سمحت عيادة الدكتور فخري في أنهي دور ؟ >>

<< الدور السادس شجة 12 >>

<< شكراً >>

كان هذا ما قاله لي البواب الصعيدي ..

طلعت شقة 12 و دخلت ، كانت العيادة فاضية ماعدا الممرضة اللي دخلتني علي طول ..

مددت علي الشيزلونج و أمامي الدكتور فخري اللي قال لي بسرعة :

– أحكيلي مشكلتك .

رديت بسرعة :

– مراتي يا دكتور ، مراتي مش مدياني أي إهتمام ، شخصيتي ضعيفة جداً قدامها ، و هي الكل في الكل في البيت .

– آة .. في حالات كتير زيك .. كمل .

– يعني من يومين يا دكتور كدة كان في خناقة في الشارع ، و لقيت مراتي رايحة تفض الخناقة .

– و أنت كنت فين ؟

– أنا كنت واقف مع الحريم علي جمب .

تنهد الدكتور فخري ثم قال :

– بص ، إحنا هنبدأ العلاج بطريقة جديدة ، لما تروح البيت عايزك بارد جداً مع مراتك و ترد عليها بقتضاب و حاول في مرة تمثل إنك إتخنقت و هتخرج برة ، و تعالالي الجمعة الجاية عشان نشوف النتائج .

* * *

روحت البيت و قررت أني أبقي حمش شوية و أعمل بنصيحة الدكتور فخري ، و أول ما دخلت البيت لقيت عديلة في وشي و قالت :

– كنت فين لوش الليل يا منيل ؟

– و أنت مالك ؟

– شحاتة .. إلزم حدودك معايا .

– من النهردا أسمي سي شحاتة فاهمة و لا لأ ؟

– سي ؟ من إمتي يا خويا ؟

– من النهردا يا عديلة , و عليا الطلاق لو ملمتيها مش هيحصل كويس .

– بتحلف عليا طلاق يا شحاته بعد 15 سنة سجن قصدى جواز بتحلف عليا طلاق , طب ورحمة يوسف شعبان فى مسلسل المال والبنون منا بيتالك فيها.. يلا يا عيال.

وساعتها قررت أروح للدكتور تانى يشوفلى حل

* * *

روحت تانى يوم الصبح للدكتور

– يا دكتور مراتى سابت البيت

– bravo .. إنتى كده أنجزت إنجاز كبير إنك تخليها تاخد على خاطرها وتمشى , ده دليل إنك ليك تأثير عليها.. روح دلوقتى هاتها من بيت أمها ورجعها البيت.

– وبعدين ؟

– هنشتغل دلوقتى على الوتر العاطفى .. الغيرة…. عايزك تجيب برفان حريمى وترشوا على نفسك ولما تسألك عايزك تبان إنك متضرب وملجلج جداً.

– تفتكر الطريقة دى هتنجح ؟

– طبعاً

* * *

– يلا بينا يا عديلة

– مش ماشية غير لما تتأسفلى

– أنا آسف يا ستى يلا بقى

ورجعت أنا وعديلة البيت

– ممكن بقى تقولى هـ … إيه ده إيه ده ؟ إيه ريحة البرفان الحريمى ده

– دى .. دى

– وكمان بتعمل فيها أهبل طب ورحمة ماما نونا فى مسلسل يتربى فى عزو منا أعدالك فيها

ورجعت مراتى تانى لأمها وسعتها قولت أروح للدكتور تانى عشان يساعدنى ولما وصلت وقبل ما ٌول أى حاجة قالى :

– طبعاً مرتاك سابت البيت تانى

– طب لما إنتى عارف إن ده هيحصل عملت كده من الأول ليه

– بالعكس إنتى كده نجحت فى الخطوة التانية , الخطوة الجية والأخيرة عايزك تروح تقول لمراتك إنك هتتجوز عليها الخميس اللى جى .

– يا نهار أسود دى كانت تخرب بيتى

– إعمل اللى بقول عليه وبس

– ماشى نجرب الطريقة دى

* * *

وروحت لعديلة البيت تانى عشان أجيبها ولما رجعنا وأعدت أنا وهى عشان نتعشى قالتلى :

– بردوا مش هتقولى برفان مين ده ؟

– ما خلاص بقى يا عدولتى

– ماشى هعدهالك المرة دى لكن ورحمة…

– خلاص بقى

– ماشى بقولك عايزين نروح يوم الخميس اللى جى النور والتوحيد نجيب لبس للعيال.

– الخميس اللى جى مينفعش

– ليه عندك درس بيانو ؟

– لأ أصل فرحى الخميس اللى جى .

– فـ.. فـ.. فرحك ؟ يا فرحة أمك بيك يا أخويا , ده إنت ليلتك أسود من سليمان عيد عايز تتجوز عليا أنا ؟ دنا أيدالك صوابعى العشرة شمع.

وشوفت ليلة فعلاً أسود من سليمان عيد وفى النهاية عرفت مراتى موضوع الدكتور النفسى …

شحاتة الحزين

تعليق واحد
  1. رواء أحمد عبد العال يقول

    خطير كريم كالعادة

اترك ردك

لن يتم نشر بريدك الإلكتروني .