شوية حاجات لازم تعرفهم لو عمرك من 16 ل 24 سنة وبتدرس

0

لو انت بتدرس ولسه ما اتخرجتش او اتخرجت ولسه فريش وطازة والدنيا لسه هتفرمك يبقا فيه شوية حاجات لازم تعرفها الاول كده عشان تعرف تمشي مع الدنيا …

قد يهمك أيضاً :

اول حاجه وانت طالب في الكلية
، اوعي اوعي اوعي انك تعتمد علي الكلية تماما كمرجعية علمية هتعلمك كل حاجة لو عملت كده هتخسر واظن كل اللي بيفكرو عارفين ده بما ان المعظم متجه للتعلم الحر او الذاتي ، بس ما تنسوش وانتو ف الكلية تستغلو كل وقت فراغ ممكن في انكم تشاركو في الانشطة التفاعلية داخل الحرم الجامعي حتي لو مش هتاخدو ي شهادة علي ده ، في الكلية او الجامعة فيه نشاطات كتير جدا ممكن تساعد علي تنمية المهارات الشخصية والعقلية ومن ضمنها لجان الاسر الطلابية و لجنة الجوالة والخدمة العامة ودول اكتر لجنتين كان ليا تعامل معاهم بشكل كبير فادني جدا ، ما تنسوش وانتو الكلية تسالو عن الاتنين ..
تاني حاجه هي القراءة :
مش لازم تكون بتحب القراءة عشان تقرأ ، لكن اللي لازم تتاكد منه ان مداومتك علي الفعل حتي لو ما بتحبوش هتولد عندك عادة وتقبل لفعل بعد كده ، يعني بالبسيط كده مش لازم اول ما تقرا تبقي قارئ مخضرم متقن لأساليب وتقنيات القراءة السريعة وقصر الذاكرة عشان تخلص الكتاب في يوم وتكون حافظة وملخصة ، لا كل حاجة بالتدريج ولازم تراعي الفروق الفردية بينك وبين اللي حواليك ، لكن باختصار القراءة هتخليك شخص واعي ومدرك للي حواليك تمام سواء اصحابك او زمايلك في الشغل او مديرينك او حتي الاوضاع القومية والدولية ، ولو اكتشفو حياة في مجرة تانية فالقراءة هتساعدك تتواصل معاهم برضو ، لذلك خلي عندك دايما ولو نص ياعه في اليوم تقرأ فيهم اي حاجة حتي لو جرايد او كاريكاتير او ميكي ، وبالمناسبة انا لحد دلوقت بقرأ ميكي عادي ما تتكسفوش يعني …
تالت حاجه وهي التجربة ،
ما تخافش من التجربة وهنا المعني المقصود مطلق ، جرب اي حاجه وكل حاجة وما تقلقش من الفشل ، الفشل طبيعي جدا لأي شخص بيحاول وخليك دايما فاكر ان اللي ما بيفشلش هو اللي ما بيحاولش اصلا ..
رابع حاجة هي النمطية :
ارجوك ارجوك ارجوك ، حاول ما تبقاش انسان نمطي ما تبقاش قالب ، العالم فيه قوالب ونمطيين بما يكفي وما تخافش من افكارك مهما كانت صغيرة او تافهة ، مع الوقت الفكرة هتتطور وتكبر وتوضح ف دماغك بشكل اكبر ووقتها هتلاقي تنفيذها بقي احسن واحسن .
خامس حاجة قاعدة ال 80%
القاعدة دي بإختصار بتقول انك لو هتفضل تستني ان اللي بتعمله يبقي بجودة 100% يبقي تيجي تتفي علي قبري لو عملت حاجة ، فا بالتالي ما يضركش انك تبقي جودتك 80% او اقل ، اهم حاجة تبدأ وتاخد خطوة وما توقفش لحظة وما تنساش ان الكمال لله وحدة ده لو انت مسلم او مؤمن بربنا ولو انت بوذي فا انا احب اقولك ان بوذا مات وهو بيبحث عن الكمال والتوحد مع القوى العظمي وما وصلش ..
سادس حاجه ودي اهم حاجة هي التنظيم والتخطيط
انت لما تكون انسان منظم ومخطط اللي انت بتعملة كويس هتقدر تحقق اللي انت بتعمله بشكل افضل بكتير وبالتالي هتعرف غلطاتك اول باول وتقدر تحاول تصلحها في كل مرة بتعمل حاجه جديدة فا التنظيم والتخطيط حلو ….

اترك رد

لن يتم نشر عنوان بريدك الإلكتروني.