أراجوز – شعر – بقلم سارة زيادة

0

اراجوز
كلاكيت اوهام

جربت تبقى ف يوم نهار
طب تبقى نار
تحرق تدمر في البشر
من غير كسوف
جربت تبقى ف مرة طير
مفرود جناحه في الفضا
معرفش خوف

جربت مرة تكون طريق
طب طوق نجاه
طب تبقى ميت مليون حياة
مجروح ورافض حتى تطلع منه آه

جربت مرة تشد حيل حد انتنى
حد انحنت راسه اللي كات طايلة السحاب
طب تبقى باب
مفتوح على شطه الامل
وتوزعه من غير حساب

جربت تبقى ايدين بتوصل للسما
تلضم بكفك توب نجوم
يخفي الهموم
منسوج فرح
وتلف بيه قلب انجرح
وانت اللي مشتاق ل الدفا
لو حتى يوم

جربت ف يوم تعمل مجنون
تقطع وتمزع في اللي شاريك
وف عز الضلمة تقع وتقوم
تصرخ وتكسر ف احزانك
وتلم العدسه المكسورة
وتحاول تعمل للنور زووووم

جربت ف مرة تعيش الموت
تتعري احلامك قدامك
وتدور فيك على ورقه توت
تتكفن امانيك في زمانك
وجدار الروح يبقالها تابوت

طب يوم جربت تكون درويش
ولقلب حبايبك تبني مقام
تتعبد جوه حدود ل اوهام
تكدب على نفسك قدامهم
و تعيش خسران
وتبين ان خسارتك فوز

جربت ف يوم تعمل اراجوز
وتلغمط وشك بالالوان
وبرغم البويه الحزن يبان
وتغطي الدمعه بالف كلوز
جربت ف يوم تعمل اراجووووز؟

انا جربت

اترك رد

لن يتم نشر عنوان بريدك الإلكتروني.