بحر الحياة – شعر – بقلم محمد عسل

0

(بحر الحياة)

البحر داهِن وشُه من حُضن السما
وحبيبتي لمّا تِنعكشُه.. بتكون سعيدة ومُغرمَة
عَ الشط فيه عُشاق كتير بيبوسوا رملُه بـ رِجلهُم
والموج بيغسل قلبهُم مِـ الذكريات المؤلمَة
الناس وشوشها مُسلسلات
بيفضفضولَك بالسُكات
وبيضحكولَك لو تشوفهُم،إنما..
الضِحكة صورة بتخدعَك
تِلمسها عينك توجعَك
وتروح لبيتها بالسؤال.. -تِقفل بيبانها ترجعَك-
فيه ضِحكة قاعدَة بتبكي عَ العُمر اللي راح
فيه ضِحكة شايفَة البحر ضاق رغم البَراح
فيه ضِحكة راحت للحبايب روچها ساح
من شمس لطَشِت وشَّها
فية ضِحكة ماشية بـ ضهرها
عَ الشط فيه سِت البنات ضفايرها باسِت كِتفها
البحر شاف نظرة عيون قلقانة جدًا -ضَمّها-
البحر خاف!
من أُم قاعدة ومن زمان بينهُم خِلاف
علشان ضَناها ف بطن حوت
كان حِلمُه رافضاه الشطوط
الموج لَقاه عايز يعيش -بس القدر قرّر يموت-

اترك رد

لن يتم نشر عنوان بريدك الإلكتروني.