نظرة فى ” حالة الإستثناء ” لجورجو آغامبين

0 541
حالة الإستثناء | لجورج آغامبين

الكتاب من أثقل الكتب اللى قريتها فى حياتى و هو يعتبر اول قراءة فعلية ليا السنة دى

الكتاب مش من نوعية الكتب الخفيفة اللى تتقرى فى يوم اتنين ثلاثة ولا فى المواصلات ولا تقضية وقت لا الكتاب عاوزك تكون متفرغ تماما ليه و انت بتقرا علشان تفهمه
الكتاب بيتكلم عن القانون و الدولة و فرض حالة الإستناء و تطبيقها و علاقتها بالقانون و حالة الضرورة
الكتاب مهم بس فى نفس الوقت صعب لدرجة انى كنت بعيد فقرات كاملة من الاول علشان افهم بتتكلم على إيه
الملحمة فى 6 فصول بدأها بشرح حالة الضرورة و قوة القانون و تطبيقه و الفصل الثالث و الرابع بالنسبة ليا هم اهم فصول الكتاب
الثالث الخاص بشرح حالة الإيوستيتيوم ” المرسوم الاخير للسيناتو ” و علاقتها بالحاكم و سلطاته و نظرية تطبيقها و حال الدولة عند فرضها أكثر من رائع و بيوضح حاجات كثير عن طبيعة حالة الاستثناء و حاجات كانت مختفية فى الفصل الاول او مش مختفية لا صعب فهمها من اول وهلة
الباب الرابع مهم جدا و صعب فى نفس الوقت بيتكلم عن الصراع على حالة الاستثناء و مين اللى يعرفها و ينظر ليها صح و الفصل بين السلطة السيادية و تطبيقها و افكار تانية مهمة جدا
ختاما الكتاب كويس جدا ومش للقارئ العادى لا هو موجه للقارئ اللى مش هيكتفى بتلقى المعلومة على طبق من ذهب لا هو هيبحث و يحاول يفهم و يحلل الى بيقراه و يحاول يفهم منه
نجمه للناشر ” مدارات ” فلولاها ما عرفت اغامبين
نجمة للمترجم اللى ابدع و خصوصا فى المصطلحات القابلة للتأويل و بتحمل أكثر من معنى
نجمتين للمحتوى الجبار بالنسبة لعدد الصفحات
هتقولى ليه فيه نجمة ناقصة هقولك الكتاب صعب يا عم لازم يتقرى تانى 😀
بس هو كتاب ممتاز بمعنى الكلمة

اترك ردك

لن يتم نشر بريدك الإلكتروني .