سواق الميكروباص الناجح – انت فين يا عم الحاج ” بالعامية المصرية ” #1

4 298

ايه دة هو فيه سواق ميكروباص ناجح ؟

ال يعنى فيه ميكروباص اصلا

حال بلدنا دلوقتى ناس بتركب عربيات ومرتاحه وناس طالع عنين اللى جابوها فى ركوب المواصلات وخاصه الميكروباصات  وعلى كل حال لا دة مرتاح ولا دة مرتاح وربنا يلطف بعباده الفترة الجايه دى .

المقاله دى مش بتتكلم عن حد معين واعتقد ان فيه ناس كتيرة موجودة بمواصفات السواق الناجح دة وكمان المفروض يكون كل السواقين بالشكل دة علشان يريحونا معاهم ولا هم غاويين وجع قلب وخلاص .

واحد بقى يطلع ويقولى يعنى ايه سواق الميكروباص الناجح دة وممكن يكون فيه سواق ميكروباص وناجح فى نفس ذات الوقت ؟

هقول للراجل اللى مش عاجبه اى حاجه وبيسأل دة … هو مش كل شغلانه فيه الناجح والفاشل ولا هى جت عليه يعنى ؟

بصوا بقى … بصيتوا خلاص

سواق الميكروباص دة راجل بشر يعنى زي وزيك وممكن يكون اخويا , ابويا , عمى … والراجل دة صاحب مهنه وشريفه وليه مهنه زيه زى اى حد تانى ومش عارف بقى ليهم نقابه هم كمان زى بقيه المهن ولا لسه بس عامه الراجل دة ليه مواصفات علشان يكون ناجح فى شغله هو كمان والمواصفات دى اللى احنا اللى بنحطها واحنا اللى بنحكم على الراجل دة انه ناجح ولا مش ناجح وشوف يا عم طالما انت بترتاح وانت راكب مع السواق يبقى اكيد فيه صفات معينه انت حاببها فيه الا لو كنت بقى انت شخصيا فاشل زى السواق الفاشل اللى بتحب تركب معاه .

طيب تعالوا نشوف نحكم على السواق دة ازاى ؟

اولا نشوف احنا لما نيجى نركب عربية بنختار ايه ” دة لو لينا حريه الاختيار من اساسه “

– الشكل العام للعربيه دى ايه

المفروض تكون عربيه شكلها حلو مش مكسره من كل حته ورابطلك الباب بحبل دة اذا كان فيها باب اصلا

العربيه تكون نضيفه من جوه مش تركب تلاقى تحتك كوم قشر لب و الكراسى كمان يبقى فيها كراسى حلوة مش جايب حته خشب تقعد عليها

اهم حاجه بقى فى اليومين السقعه دول يبقى فيها ازاز علشان منموتش من البرد

وبس دة يا عم مش كتير يعنى لا بقولك هات عربيه احدث موديل ولا تكييف ولا كلام من دة عامله معامله زى الناس بس م احنا ولاد ناس بردة .

 

ونكمل معاكم بقى فى مقاله تانيه ان شاء الله

4 تعليقات
  1. سالم المطيرى يقول

    ههههه الله يعينكم وتلاقوه

    1. Mohamed Saad يقول

      كل شيىء موجود بس اللى يدور 😀

  2. زين عبد السلام يقول

    اطلع بينا يا اسطى

    1. Mohamed Saad يقول

      على فين يا استاذ ؟ 😀

اترك ردك

لن يتم نشر بريدك الإلكتروني .