لقاء مع الكاتب محمود بكرى

0 595

محمود بكرى ، من الاسماء الشابة التى ظهرت مؤخرا على الساحة الأدبية فى مصر . استطاع بروايتيه (مالك ،بره الدنيا ) ان يخطف اﻷنظار سريعا ، وان يحجز له مقعدا مميزا بين كبار الكتاب .

محمود-بكري-2

فى البداية نحب نرحب بحضرتك فى مجتمع حروف ، وياريت تعرف الجمهور بمحمود بكرى اكتر .
محمود بكري .. انا زي اي شاب مواليد 1993 .. معايا دبلوم صنايع .. وبكتب من 2013 .

مين الكاتب اللى محمود بكرى بيتمنى يكون زيه ، وبينتهج نهجه ؟
مبتمناش اكون زي حد .. بتمنى اكون محمود بكري الكاتب المصري اللي قدر يحقق اسطورته الشخصية وكتبه تترجم لاكتر من لغة .. وبحلم بالبوكر .

مالك ، بره الدنيا . أيهم أصعب البداية أم الإستمرارية ؟
مالك كانت صعبة في اني اوصل للقارئ الحالة اللي عاشها البطل .. والحمد لله قدرت اوصل الاحساس ده للقارئ
بره الدنيا كانت صعبة جدا اني اقدر ابين النضج والاجتهاد فيها .. واعيش القارئ في العالم اللي خلقتهوله بره الدنيا
الـ 2 اصعب من بعض بس الاستمرارية اصعب شوية لانها اللي خلتني اقرر اني اكمل

“لا يكفيهم ما رحل منا معهم … لا يعلمون أن القلب ينبض لهم وأننا موتى منذ رحيهم ” قلم محمود بكرى يتميز بالصدق والمثالية فى بعض الأحيان والمشاعر النبيلة . ممكن نقول قلم نظيف . هل من وجهة نظرك فى حاجة أسمها أدب نظيف ؟ ويعنى ايه ؟ ولا مفيش قيود على الكاتب والمفترض يكتب فى كل حاجه . وهل الكتابة رسالة ومسؤلية ؟
بص مفيش حاجة اسمها قلم نظيف وقلم مش نظيف .. بس الموضوع بيكون طريقة تعبير .. انا مبعرفش اجرح القارئ بلفظ او شرح تفصيلي لحاجة معينه .. بحاول اوصل الاحساس بالحالة دي واسيب القارئ يتخيل بقى كل حاجة بنفسه .. فالموضوع راجع لمراقبة الواحد للناس ونبذهم للنوع ده من الكتابة .ومراقبة الواحد لربنا برضه عشان الكلام ده هيعيش واحنا نموت .

ممكن حضرتك تكلمنا عن المجموعة القصصية الإلكترونية (إحتياج ) ؟
المجموعة القصصية كانت عبارة عن قصص ما يطلبه المستمعون 😀
يعني كنت بكتب اللي بيطلبه مني الناس على جروب عصير الكتب .. واتجمعوا في ملف واحد وعدد التحميل ليه كان مفاجئة وهو اللي شجع الناس وشجعني انهم يطلبوا مني رواية ورقية عليها اسمي .

“أنتى الحاجة الوحيدة الكاملة المتكاملة فى حياتى . أنت أنا .” من وجهة نظرك هل الكتابة إنعكاس لحياة الكاتب اللى بيمر بيها ؟ وبنسبة كام فى المية ؟ بمعنى ان الكاتب لو كتب رومانسى ، هل ده دليل انه بيمر بقصة حب مثلا ؟
لا خالص . انا بحاول اوصل احساس البطل والبطلة مش اكتر .. ومينفعش تكون الرواية انعكاس لحياة الكاتب والا هيجي في يوم وهيبطل كتابة .

” يعرف انه فى بعض الأحيان يفضل الإنسان الصمت ، وان لم يحب الوحدة ، ونادرا ما نجد من يحترم هذا السكون متفهما ، ويظل بجانبك سندا وأمانا .” مين السند اللى دايما كان واقف جمب محمود بكرى ؟
القراء .. المتابعين ليا باستمرار اللي حابين يقروا ليا كل جديد .. دول السند اللي عمل محمود بكري بعد ربنا .

هل فى دروس أو أخطاء استفادتها من كتابك الاول تحاشيتها فى كتابك التانى ؟
طبعا , انا فضلت سنة كاملة بتهاجم يوميا على بساطة الاسلوب وضعف اللغة والحمد لله قدرت اتلاشى ده في بره الدنيا .

رائيك بصراحة فى القارىء المصرى حاليا ، وايه نوع الكتابة اللى بينجذب ليها ؟
القارئ المصري حاليا انضج بكتير من قبل كده .. ونوع الكتب اللي يجذبه اللي يكون قريب من حالته وحياته اللي عاشها .

فى بعض القراء وصفو رواية “مالك” بأنها غير واقعية ؟ ايه خلاهم يقولو كده ؟
لان المثالية اللي فيها هما شايفنها اوفر ومش موجودة
بس الحقيقة ان المفروض نكون مثاليين كده بس اللي بيحصل العكس

“الأمان موطنه الثقة … مهما كانت الظروف من سيثق بك سيشعر بالأمان بجانبك .” هل محمود بكرى حاسس بالأمان حاليا ؟
الحمد لله .. ربنا يخليلي خطيبتي اللي هتكون زوجتي قريب جدا ، هي مصدر الامان والسند في حياتي .

رائيك فى كثرة الكتاب الشباب على الساحة ، وهل هذا يخلق نوع من المنافسة بينهم ؟
اكيد طبعا .. اللي بيميز جيلنا دلوقتي اننا بنتنافس رغم قوة العلاقة والروابط بينا .. ودي حاجة مبهجة جدا .

” ده حلم من الأحلام اللى ما بتتحققش ، ومينفعش تتحقق .هل فى حلم من أحلام محمود بكرى لم تتحقق ؟ وايه اكتر عراقيل واجهتك فى مشوارك الادبى ؟
لغاية دلوقتي ربنا بيساعدني في تحقيق احلامي .. ممكن اكون مستعجل على حاجات معينه بس انا واثق في ربنا انها هتتحقق قريب
العراقيل كانت موجودة فيا وهي اني عايز اقدم حاجة اقوى من مالك والحمد لله قدرت اعمل ده في بره الدنيا .

” من أبعد مكان جواك ” ايه أبعد مكان جوا الانسان ؟
قلبه ..

” مش كل النهايات وجع .. النهايات دائما بتكون بداية لشىء أخر .. فأنتظر .” منين محمود بكرى جايب جرعة التفاؤل دى ، وسط الظروف اللى عايشينها ؟
ماهو لازم وسط الظروف دي كلها احنا دورنا ندي الناس امل في الحياة .. نوريهم الجانب الكويس في النفس البشرية .

بنشكر حضرتك جدا لقبول الحوار وقبل ما نختم لقائنا مع حضرتك ، ياريت كلمة توجهها لموقع مجتمع حروف .
اداء متميز .. بالتوفيق يارب .. وان شاء الله في تقدم وتميز .

الكاتب محمود بكرى فى ضيافة مجتمع حروف شارك معنا بأسئلتك 

اترك ردك

لن يتم نشر بريدك الإلكتروني .