لقاء مع الكاتب أحمد ابراهيم اسماعيل – حصريا على مجتمع حروف

23 1٬369

على الرغم من صغر سنه ، إلا انه استطاع أن يبنى له قاعدة جماهيرية واسعة فى فترة وجيزة ، وان يحجز مقعد له وسط كبار الكتاب ،ورغم ذلك لم تمنعه موهبته من تفوقه الدراسى ، بل العكس استطاع ان يثبتها ويثقلها بطموحاته وأحلامه الغير محدودة التى شكلت أهم سماته .

Books

السلام عليكم دكتور احمد يارب حضرتك تكون بخير ، حضرتك شرفت مجتمع حروف بقبول الحوار

وعليكم السلام اهلا بحضرتك

(الحادثة، مسافر وحيد ، سرباز ) بالإضافة لمجموعة شعر لكاتب لم يتعد 25 سنه ودراسة صيدله ، ماشاء الله حصيلة قوية فى سن صغيرة، ياريت حضرتك تعرف الجمهور اكتر عن احمد ابراهيم .

فى البداية باشكر حضراتكم طبعا على الحوار…انا أحمد ابراهيم اسماعيل مواليد مدينة الحوامدية 1990 خريج كلية صيدلة جامعة القاهرة
للعام2012.

البداية الأدبية كانت من سن 9 او 10 سنين عن طريق كتابة قصص صغيرة ومقالات تليق بهذه السن ثم كانت البداية الأولى للنشر مع مسافر وحيد فى يناير2012

عناوين كتب حضرتك قوية ماشاء الله ، سر اختيارها ومعنى سرباز ايه ؟ واكتر عمل فيهم قريب ليك ؟

معنى سَرْباز افضل نكتشفه من الرواية نفسها لكن كنبذة صغيرة عنها هى جزء أول من خماسية هتتنتهى ان شاء الله فى العام 2022

الكاتب مجموعة تجارب ، اكتر تجربة اثرت فى دكتور احمد ، سواء للأفضل او العكس ؟

“الالم وقود الفن”…دى مقولة انا مؤمن بها جدا وده اللى حصل فى تجربة موت مجموعة من اعز اصدقائى بدأت ارثيهم مع الوقت بمجموعة خواطر واشعار وده بالفعل ساعدنى بعد كده انى ارجع تانى للكتابة من خلال التجربة دى بعد ما كنت سبتها فترة

كلنا ملاحظين انتشار مواقع التواصل الاجتماعى سواء فيس بوك او تويتر ، هل المواقع دى بتخدم وبتصب فى مصلحة الكاتب ولا العكس ؟ بتأثر فى نسبة مبيعاته مثلا ؟

خلينا الأول نتفق على نقطة ان الرسالة الأولى للأدب هى توصيل رسالة وفكرة وهدف ومناقشة قضية وتقديم حلول لها ده مش مشروع قصده الربح وبالتالى ده بيصب فى مصلحته جدا كانتشار للقضية والفكرة والهدف دول

يعنى كده بيصب لمصلحة وشهرة الكاتب

طبعا

اقصى مدة ممكن الكاتب يسيب الورقة والقلم قد ايه ؟وهيرجع زى الاول ولا اقل ؟

الكتابة حالة وليست مهنة…وبالتالى الكاتب ممكن يفضل سنين وممكن يكتب كل يوم وكل ساعة…الأمر متعلق بايمانه برسالة وقضية وشعور بيكتب عنه وينقله ولو ده مش موجود عمره ماهيكتب

فى الفترة اللى فاتت بعض الكتاب والأدباء بيستخدموا تشبيهات جريئة ومصطلحات قد لا تناسب مجتمعنا وثقافتنا بحجة انها اصبحت منتشرة والأديب لازم يتصف بالجرأة وده لاحظتو ف كتاب كتير ، رأى حضرتك فيه ايه ؟

اعترض بشدة طبعا..مهمة الأدب انه يحل المشكلات مش يساهم فى نشرها…الواقع موجود ده فيه فعلا بس انا ككاتب لو نقلت الواقع ده اما انى اعالجه واقدمله حلول واضحة واما منقلوش اصلا

اكتشاف الموهبة حضرتك شايف ليها سن معين ؟ يعنى ممكن انا مثلا اكتشف مقدرتى على الكتابه مثلا فى الاربعين ؟

غير مرتبطة بسن تماما لأنى زى ماقلت لحضرتك دى مش مهنة دى رسالة والرسالة مرتبطة بالقدرة على تمثيلها وعرضها بشكل أمثل بغض النظر عن السن

نصيحة حضرتك تبعتها للكاتب المبتدأ

هم نصيحتين…ابعد عن التكلف..واهتم بالمجتمع اللى انت منه وحل مشكلاته متبعدش عنه

لو هتوصفلنا مكتبتك ، شكلها ايه ؟ واكتر كتب مسيطرة فيها نوعها ايه ؟ ولمين ؟

الكتب الأكتر كتب الرافعى والعقاد واحمد حسن الزيات والمنفلوطى عموما لأن دول اهتموا بتدعيم اللغة والادب كناحية جمالية فنية واهتموا فى نفس الوقت بالناحية المجتمعية وعرض قضية ومشكلة وحلها . بالاضافة طبعا لبعض كتب راغب السرجانى فى التاريخ الاسلامى وبعض الروايات

رأى حضرتك فى كثرة الكتاب الشباب على الساحه هل دى موهبة ولا مجرد تنفيس عن مكبوتاتهم، فى حين القراء كل يوم فى نقصان ؟

للقارئ الحكم الوحيد على كده لكاتب اللى هيحسس القارئ انه معاه فى مشكلاته وقضاياه وظروفه مش فى عالم خيالى هو اللى هيكمل لأن الكتاب ده مشروع عمر بيستمر سنين والاستمرار للسنين دى هيتوقف على امكانية الكاتب ده فى الوصول لقلب القارئ وعقله وهيقدر يحكم مين يستحق يكمل معاه

عوامل نجاح الكاتب الممارسة اكثر ولا الموهبة ؟ وهل فى عناصر اخرى ؟

الاتنين مكملين لبعض مع وجود عنصر تالت مازلت مصمم عليه وهو القضية او الرسالةمع القراءة المستمرة والتطوير الذاتى طبعا

 اكتر رواية حضرتك بتحبها ويوم مالدنيا بتضييق ، دكتور احمد بيجرى عليها عشان يستمد قوته منها ؟

هى مش رواية هو كتاب المساكين للرافعى كتاب عبقرى بكل معنى الكلمة بيشرح فيه معانى الفقر والحاجة والاستغناء من كافة الزوايا مش بس المادية

كاتب بالنسبة لحضرتك المثل الأعلى ، نفسك فى يوم تكون زيه ، ياترى مين ؟

الرافعى طبعا

دكتور احمد حقق كام فى المية من اللى كان نفسو يحققو ، وشايف نفسك فين هتكون بعد 10 سنين ان شاء الله

حققت 4%

وده تواضع ، ولا شايف موهبة حضرتك اقوى من كده ؟

انا حلمى اكون الكاتب الأول فى العالم كتبى تساهم فى حل مشكلات وعرض قضايا مش مجرد شئ ترفيهى لتضييع وقت وده هيحتاج شغل ليل ونهار لسنين طويلة…مش تواضع ولا شايف انى موهوب انا بس بحاول ارسم احلام قوية اوى عشان دايما افضل فى وضع استنفار وشغل دايما لازم احسس نفسى ان قدامى كتير اعمله

اخر سؤال بقى لان طولنا على حضرتك كتير – قدام حضرتك كتاب من كتبك ، طلبنا فيه انك تكتب اهداء فى حوالى 3 سطور ، هيكون لمين وفيه ايه ؟

لا خالص والله ده انا سعيد بحضرتك جدا الكتاب هيكون للإسلام – والـ 3 سطور محتواها هيكون “الى الجانب الأكثر اشراقا فى حيواتنا، مازلنا بحاجة لكل مداد من صحائفك، لكل مشكاة من أنوارك، مازلنا بحاجة لقوة سماحتك، لعنفوان لينك، لقوة منطقك…عد فإنا بدونك ضائعون!”

ان شاء الله من نجاح لنجاح وكل يوم حوار بس مع حد اقوى مننا

العفو والله ربنا يكرمك انا اللى كنت سعيد جدا بالحديث مع حضرتك و مش هلاقى اقوى منكم اكيد

ونرحب بكافه اسألتكم واستفساراتكم ويتم الرد عليها ان شاء الله تعالى من خلال هذا الموضوع

 أجرى هذا اللقاء : رواء أحمد عبد العال

23 تعليقات
  1. غادة الباز يقول

    حضرتك شايف مصر ازاي في المرحلة الحالية

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      مصر حاليا بيلخصها وصف واحد…عبث! محدش عارف حاجة ولا حد عارف حتى هو عايز ايه بالظبط مشكلتنا اننا بقينا بنصدق اللى احنا عايزينه حتى لو غلط وده اللى ضيع الدنيا

  2. Mohamed Saad يقول

    بدايه انا سعيد جدا باللقاء دة وبوجودك معانا فى مجتمع حروف
    وكنت عايز أسأل عن رأيك فى الناس اللى بتوفر الكتب والروايات pdf بشكل مجانى وهل هناك طريقه لمقاضاتهم ؟
    ويا ريت تقولنا رأيك فى موقعنا المتواضع
    وشرفتنا بوجودك معانا .

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      ربنا يكرمك والله انا اسعد بوجودى وسط ناس جميلة زيكم يارب اكون على قدر الثقة دى منكم :))

      رأيى ان الأدب رسالة سامية وليها هدف وقضية مينفعش يبقى همنا اننا نتكلم فى فلوس او عائد من وراها لان ده لا يليق بالرسالة المرادة منها…الاهم ان الرسالة توصل وتنتشر بشكل كويس وهادف…وبالتالى انا مش شايف مشكلة نهائى فى الpdf خصوصا ان ال pdf له جمهوره اللى بيستناه حتى لو عنده قدرة اقتناء الرواية ورقيا والعكس صحيح ممكن تكون متوفرة pdf والقارئ مبيحبش الا النسخة الورقية

  3. وائل مراد يقول

    هو علشان نسمى حد بلقب كاتب لازم يكون نزل ليه كتب مطبوعه ولا اى حد بيألف يبقى كاتب ؟

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      الكاتب ده اسم فاعل من الكتابة مش من النشر او الطباعة وبالتالى كل اللى يكتب حاجة ينطبق عليه الوصف بس الفرق فى هوية الحاجة دى وهدفها ورسالتها وتأثيرها ف الناس

  4. اسلام الكنانى يقول

    كاتب مبدع وهقو زيهم
    #مستنى_سرباز 😀

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      هاهاهاهاهاهاهاهاها ربنا يكرمك يا اسلام تسلم يا جميل يارب بس تعجبك 😀

  5. كريم محمد يقول

    كلمنا شوية عن سَرْباز عشان الأسم غريب جداً .. و بتحب تقرأ إية و لمين ؟

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      هو الاسم خلينا نكتشفه مع بعض فى الرواية علشان منحرقوش :] لكن بشكل عام الرواية جزء أول من خماسية هتنتهى سنة 2022 ان شاء الله بتسلط الضوء على المجتمع المصرى من قاعه حتى اعلاه اجتماعيا ومعيشيا من خلال 3 فئات عايشين فى 3 مجتمعات مختلفة فى قرية ريفية صعيدية وحارة عشوائية فى قلب القاهرة وحى راقى فى القاهرة وده بطبيعة الحال بيشبك الأحداث ببعضها بطريقة ما هنكتشفها مع بعض ان شاء الله 🙂

    2. احمد ابراهيم اسماعيل يقول

      بحب اقرأ للجيل القديم الرافعى والعقاد والزيات واحمد امين والمنفلوطى ونجيب محفوظ وحاليا رضى عاشور ويوسف زيدان

  6. ابن الناس يقول

    استاذ أحمد كاتب رائع وله مستقبل كبير نظرا للكم الهائل من المعجبين
    رنا يوفقك ومتنساناش من كتبك الجميله

    1. احمد ابراهيم اسماعيل يقول

      اولا انا اسف جدا جدا جدا على التأخير فى الرد نظرا لظروف قهرية والله :))

      ربنا يكرم حضرتك والله دى شهادة اعتز بها جدا جدا والله يارب دايما اكون عند حسن الظن 🙂 🙂

      1. ابن الناس يقول

        والنبى انت راجل عسليه

        1. احمد ابراهيم اسماعيل يقول

          هاهاهاهاها حبيبى والله ربنا يكرمك 😀

  7. احمد سعيد بخيت يقول

    جميل يا احمد ما شاء الله عليك ومن نجاح لاخر يارب 🙂

    1. احمد ابراهيم اسماعيل يقول

      ربنا يعزك يا فنان يارب كل نجاح واحنا مع بعض :]

  8. ابن الناس يقول

    ايه تأثير دخولك الجيش على عملك الادبة ….. شوفت صورك فى الجيش على الفيس
    وهل اصدقاءك فى الجيش ليهم وجود فى قصصك وكتاباتك ؟

    1. احمد ابراهيم اسماعيل يقول

      سرباز فيها فصل كامل عن حياة الجيش واللى شفته فيه ومعظم الشخصيات فيه حقيقية بأسمائها :]

      1. ابن الناس يقول

        طب ما تنزلهالنا pdf وخلاص يا عم انت بتشوقنا ليها ليييه وهى هتنزل امتى ان شاء الله وهل فيه مكتبات بتتعاملوا معاها فى الشرقيه ؟

        1. احمد ابراهيم اسماعيل يقول

          هاهاهاها والله انا معنديش مانع خالص :D…موضوع المكتبات ده دار النشر تعرفه اكتر هاسألك حاضر خريطة التوزيع ايه بالظبط 🙂

  9. Manar Wagdi يقول

    كالعادة صديقى دوما مميز .. حلمك على قياسك وسيتحقق بإذن الله

    فخورة بك دائما 🙂

  10. سارة عنتر يقول

    كما عهدنا منك دائما التميييز ف كل شيء
    حقق الله لك حلما
    دومت زارعاً للمباديء والقيم ف الشباب
    دومت حلقة وصل بينهم وبين انتمائهم لاخلاق دينهم التي ما لبثت ان ظهرت علي حوارك
    وفق الله خطاك واعانك علي تحقيق حلم بدأت اول خطواته
    أنت حقا كاتب متميز مهما بلغت كلمات الثناء لن توافيك حقك 🙂

اترك ردك

لن يتم نشر بريدك الإلكتروني .