يوميات زوج حزين – الحلقه الأولى “حماتى العزيزة ” – لـ كريم محمد

6 396

يوميات زوج حزين – الحلقه الأولى “حماتى العزيزة “

مقدمة

بعد أنا أنهيت غسيل الصحون و تنظيف البيت و الطبخ و غسيل الملابس و نشرها كنت متعباً جداً جداً و العرق يتصبب من أعلي قرعتي التي ورثتها عن أبي بالمناسبة أنا أسمي ( شحاتة الحزين ) من عيلة ( زعلان ) باشا الكبير و أسمي بالكامل ( شحاتة الحزين أبو دمعة زعلان ) و طبعاً لأنكم شديدوا الملاحظة فأنا متأكد من أنكم لاحظتم طبعاً أن عائلتي كلها –و بلا أستثناء-حزينة لان جدي ( زعلان ) باشا الكبير رحمة الله مات محروق و أبنة الحج ( أبو دمعة ) مات مسموماً و بابا رحمة الله مات من أزمة قلبية و جميع هؤلاء ماتوا بسبب شئ واحد و أنا متأكد أنكم تعرفوا جيداً….

هو الزواج….كانت زوجة جدي ( زعلان ) باشا الكبير تجعلة يحل محلها في كل شئ الغسيل و الطبخ و تربية الأطفال علي بلاطة يعني هو أتبهدل أوي أوي أوي….و زوجة الحج ( أبو دمعة ) كانت بتعمل نفس الحكاية معاة و تتناقل الأفعال و التصرفات للزوجات علي مدا العصور حتي يأتي دوري لأن زوجتي تفعل هذا معي….

-<<خلصت الغسيل يا منييييل؟؟!!>>-

-<<جايلك يا حياتي>>-

معلش يا جماعة قدري بيناديلي سلام دلوقتي….

…….!

1-حماتي العزيزة

تعالوا نتكلم عن زواجي من مراتي و أم عيالي ( عديلة ) ، كانت ذكريات عمري ما هنساها – أصل الذكريات السودة عمرها ما تتنسي – ، حماتي طبعاً كانت رافضة الجواز – الله يمسيها بالخير – .. لسة فاكر أول مرة أتقابلنا فيها أنا و ( عديلة ) ، كنا في الكلية مع بعض و في يوم .. أغمي عليها – كانت ضاربة كشري من عند أبو طارق قبل ما تيجي الكلية- و أنا لحقتها و من ساعتها عرفنا بعض .. و شاء القدر أن تجمعنا فيما بعد علاقة زوجية – سودة- سعيدة من طرق واحد –الزوجة طبعاً- و تعيسة من طرفي أنا ..

لسة فاكر اليوم –الأسود- اللي رحت أتقدم لها فية ، دخلت أنا و أمي عليهم لما فتحت لنا الشغالة لاقينا أبوها مرمي علي الكنبة ضارب البوكسر

 

و الحمالات و ماسك نص بطيخة ، لسة بقول لة يا عمي ، شاورلي علي أوضة في آخر الصالة ، و قال لي : خش أتكلم مع أمها أنا هنا بدفع فواتير و بتضرب بس !!

سبت الأستاذ ( قرتاص ) يكمل البطيخة مع نفسوا و دخلت الأوضة ، لقيت عديلة و أمها .. فقلت :

-سلام علـ…

قاطتعتني حماتي و قالت : و عليكم .. أقعد هنا أنت و الحاجة ، و إية الشوكالاتة اللي أنت جايبها دي؟

فقلت : أمال المفرود أجيب إية ؟!

حماتي : المفرود دة عند المكوجي مش هنا.

من الواضح إن أنا داخل علي أيام لبط و عوق و سكة شمال…

حماتي : بص .. أنا الود ودي أقوم أكرشك من هنا مع إحترامنا للحاجة .. بس بنتي شارياك ، بس عارف لو زعلتها ؟

بلعت ريقي بصعوبة لما تخيلت الموضوع في دماغي..

حماتي : لو زعلتها ، هخليك زي الراجل اللي متلقح برة دة .. بالنسبة للمهر و الشبكة و الكلام الفاضي دة ، إحنا مالناش فية ، إحنا بنشتري راجل ..

قلت : دة العشم برضوا.

حماتي : المهر 10 تلاف و الشبكة سلسلة و خاتم .

قلت : علي أساس أن أنا واحد غير اللي كنتي بتكلمية من شوية؟

حماتي : ع البركة .. نقرأ الفاتحة و المعوذتين !!

إقتربت من أمي و سألتها : ماما ؟ أقول أذكار الصباح و المساء بالمرة ؟

*  *  *

و أتجوزنا …. لسة فاكر يوم الفرح .. يوم جميل ، مطلعلهوش نهار ، المعازيم حضروا أول الفرح بس علي نص الفرح كدة البوليس جة لمهم علي البوكس ، يوم ما أجي أناسب أناسب أفضل عيلة بتوزع مخدرات في البلد – مع الإعتذار لمجدي الجلاد و اللي بيجيب لة الصنف – …

كنت متوقع بقي أن ( عديلة ) مش هتطلع مفترية زي حماتي ، لكني كنت حماار ، لأنها طلعت نسخة كاربون من أمها ….

عمري ما هنسي يوم م أمها شالت الزايدة ، روحنا نبات هناك معاها يومين لحد ما تخف ، أول لما دخلنا البيت ، نفس المشهد ، حمايا متلقح نفس التلقيحة بتاعت المرة اللي فاتت بالبوكسر و الحمالات و نص البطيخة و هو منشكح علي الآخر ….

و لك أن تتصور سعادتي البالغة في الوقت دة لأني طول النهار بعمل شغل حماتي ، و كل دة تحت إشراف المفترية مراتي ، و آخر الليل أتلقح جمب حمايا بالزي الرسمي و نص البطيخة ..

و في الفترة دي كنت لازم أوصل ولاد أخت مرات المدرسة و أرجعهم تاني – أصلي بقيت تاكسي العيلة خلاص و الحمد لله و كل واحد بياخد البونديرة بتاعتوا – ….

*  *  *

و جاء اليوم التاريخي لكل عيلة مصرية أصيلة ، يوم المصيف ، و ساعتها حماتي قررت تطلع معانا هي و حمايا ، المشهد كالتالي ..

أنا واقف بخلي بالي من الشنط و حماتي و مراتي بيتخانقوا مع ناس تانية من غير سبب ، و حمايا –كالعادة- متلقح علي الشط بالمايوة و نص البطيخة ..

و لسة بخش عشان أحوش ألاقي حماتي سابت الخناقة و مسكت فيا أنا ، في النهاية أحب أوجة رسالة لكل واحد لسة عازب ، أوعي تتجوز مهمي أهلك ضغطوا عليك ……

كريم محمد

 

6 تعليقات
  1. ابن الناس يقول

    يو ار بروفشنال

    1. كريم محمد يقول

      عارف عارف 😛

  2. رواء أحمد عبد العال يقول

    كريم بجد انت عسل أوى ، وبستنى كتاباتك جدا ، بجد ضحكتنى جدا .

    1. كريم محمد يقول

      أشكرك جداً يا رواء .. كلامك دائماً بيفرحني

  3. اسامه كمال يقول

    عسل يا واد يا كريم

  4. sharif rabie يقول

    ماااااااااااااااااااااااات القراااااااااااااء جميعا☺ ☺ من الزعل طبعااااااااااااااا☺ ☺

اترك ردك

لن يتم نشر بريدك الإلكتروني .